Öpdate

Xin chào, ich bi scho in Hanoi und blangä druff, dass d Michi morn achund 😀

Da mal churz was i de letschte zwei Wuchä so gloffe isch:

Nach Dalat bini mim Easy Rider uf Lak Lake gfahre und nah wiiter uf Nha Trang as Meer. Die Töfffahrt hedmer so guet gfalle, dassi zwüscheziitlich scho zweimal mitme Töfffahrer en grösseri Tour gmacht ha, anstatt mim Bus vo A nach B z fahre. In Nha Trang bini zwei Täg blube und bi dettä beid Täg gu Tauche. Voll cool gsi.

De bini mitme Schlafbus es rächts Stuck obsi gfahre uf Hoi An. Zerst hani det nume öppä zwei Nächt wellä bliibe. Es hedmer de aber aber so guet gfalle, dassi gad vier blube bi. Vo Hoi An bini de mitme Töfffahrer wiiter übere Wulchäpass (Hai Van) uf Hue. Hue isch die alti Kaiserstadt, die hani de aber nachme Tag gseh gha und bi de wiiter.

Wieder mit eim mitme Töff bini zerst d Vinh Moc Tunnel gu aluege, zude DMZ (die entmilitarisierti Zone zwüsched Nord- und Südvietnam) und denn wiiter uf Khe Sanh. Vo Khe Sanh simmer de übere Ho Chi Minh Pfad uf Phong Nha.

In Phong Nha bini de uf eigeti Fust de Nationalpark und siini Höhlene gu erkunde. Schlussendlich bini de vo Phong Nha uf Dong Hoi a Bahnhof und de mim Zug uf Hanoi. Yeah ändlich mal vietnamesische Zug gfahre.

Ide nächste paar Täg stahd etzt z erkunde vo Hanoi aa und de gömmer öppä mal id Halongbucht, oder wohii au immer dasses üs de aneverschlad. Übrigens ich ha d Karte mit de Route nu aktualisiert.