Per Boot über die vietnamesisch Grenze

Eingetragen bei: Kambodscha, Reise, Vietnam | 0

Nach mim Inselufenthalt bini, nachdem ich wieder ufm Festland gsi bi, mim Bus uf Phnom Penh. Ha det eisch übernachtet, dassi am andere Morgä ufs Boot ha chönne, wo de Mekong durab uf Vietnam gfahre isch.Am Morgä am 8i bini also im Hotel abgholt worde mitme Busli. De simmer zerst ines Büro gfahre worde, wo kontrolliert hed obmer de alli au scho z vietnamesische Visum hend. Es sind usser mier nu füüf ander gsi: en Franzos, zwei Italiener und zwei Australier (wobii sie eich Dütschi isch). Alli hend es Visum gha und de hed üs ds Büro eröffnet, dassmer de mim Bus a Grenze fiehred, will z Boot kaputt siig. Immrhin hemmer en Teil vom Geld zrugg übercho. Also ab i Bus und öppä zwei Stund durch die Pampa.

Bismer a kambodschanisch Grenzposte cho sind. All hend müesse usstiige und z Gepäck mitnäh. Zumne Hüüsli ane und hend en Stämpel übercho für Kambodscha. Denn simmer ufnes Boot gschücht worde und sind de losgfahre.

Wiit simmer aber nid cho. Öppä hundert Meter Flussabwärts hemmer bim vietnamesische Grenzposte ghalte. Usstiige Pass ane, Stempel ine, iistiige, immerhin dasmal ischs zügig gange 🙂 und am Mittag ume simmer de au in Chau Doc acho. In Chau Doc hemmer de au nu chönne en Fischzucht gu besichtige.

Ich ha eich gmeint ich müess der übernachte, ha de aber doch nu en Bus gfunde und bi mit de zwei vo Australie uf Can Tho im Mekong Delta gfahre.

Hinterlasse einen Kommentar