Hello from the other side

Yeah ich bi z Down Under acho. De Michi ihri Feriä sind leider fertig und sie hed müesse heigah 🙁 aber mii nächst Reisegspane isch scho acho 😀 de Utti. Etzt möchti aber da nu chli schriibe, was d Michi und ich nu so gseh hend. Ich hoffe, dassi de au nu eisch chli Fotäli cha ufelade.

Da mal wieder d Karte mit minre Route.

Nach Vientiane heds üs i Süde vo Laos zogä uf d 4000 Inslä vom Mekong und mer hend nu es paar Tag uf Don Det verbracht. Mit Nachtbus ischs de über die laotisch/thailändisch Grenze uf Bangkok gange.

In Bangkok hemmer de d Vorzüg vode Grossstadt gnossä und hend üs gfreut au mal wieder öppis anders z ässä. Mer sind au gu Sightseeing mache und gu shoppä. Vo Bangkok us hemmer de z Flugi gnu zum uf Myanmar z flüge.

Dr ersti Stopp in Myanmar isch in Yangon gsi, de Hauptsadt. Det heds ä huufe Pagodne gäh zum aluege. Mim Nachtbus ischs denn wiitergange a Inle See. I dem Bus innä hends die ganz Nacht uf 17° abe küehlt gha, was für mich glaubs chli z vill gsi isch drum heds mi de zerst mal is Bett grüehrt.
Nach zwei Tag im Bett bini de wieder fit gsi und mer hend chönne en Tour mache ufm See. Anschliessend ischs de mim Bus i Westä uf Bagan gange. Die Tempel sind würklich sehr iidrücklich gsi! Mr hend Elektroroller gmieted und sind die verschiedne Tempel uf eigeti Fust gu erkunde und vo Sunneuf- bis Untergang unterwägs gsi.
Vo Bagan simmer de via Yangon uf Kuala Lumpur gfloge, de Hauptstadt vo Malaysia.

Nach es paar Täg in Kuala Lumpur heds üs de uf Borneo verschlage. Gnauer gseid uf Kuching im südliche Teil vo malaysisch Borneo. Det simmer i Nationalpark gu wandere, gu luege wes de Orangutans gahd und ine Krokodilzoo.

Nächste Stopp isch Singapur gsi, en krasse Gägäsatz zu allem womer bis etzt gseh hend. Mega suuberi, mega grossi Stadt, aber au mega tüür, drum simmer de glii wiiter uf Indonesie.

In Bali acho simmer nume ei Nacht blube, zum gad wiitergah uf Flores. In Flores hemmer nämlich es Liveaboard bueched gha. Das isch es schwimmends Hotel gsi ide nöchi vo Komodo. De hed mer de ganz Tag chönne gu Tauche und Schnorchlä ade coolste Spots. En Usflug uf Rinca zude Komodowarane hemmer de au nu gmacht und nah simmer de wiiter uf Lombok. Lombok isch aber au nume en zwüschehalt gsi zum uf d Gilis zcho.

Gilis sind en chliini Inselgruppe zwüsche Bali und Lombok. Gili bedüted eigentlich au „chliini Inslä“. Mier hend de es paar Täg im Nordä vo Gili Trawangan verbrunge. Det simmer am Pool und am Meer glägä, hend z Inselläbä gnosse und ich bi öppä mal gu Tauche.

Die letscht wuche hemmer de uf Bali verbracht, nachme Zwüschehalt in Ubud ischs uf Lovina im Nordä gange. Mier hend es super Resort gha, wos üs a nüüd gfählt hed und mier üsi letschte Täg uf Bali nu hend chönnä zämä gniesse.

Das isch de z ändi gsi vom Südostasie-Abentüür und etzt fahd Australie aa. Nach zwei Nächt in Perth übernehmed de Utti und ich am Samstig en Camper. Mit dem fahremer de uf Broome ufe wo am 30. Juni z Mueti, de Dädi und d Martina achömed. Am 1. Augste gahds de füre Utti wiiter uf Kuala Lumpur und für üs uf Darwin.