Phnom Penh

Huiuiuii ganz viel isch also gloffä und ich bi chum dezue cho öppis dezue z schriibe…defür hani umso meh gfötäläd. Fotäli warted etzt all druff nu gsortiert zwärdä xP Etzt aber churz was gloffä isch und nah wases i dem Artikel zgseh gid:

Also ich bi am 5. März in Bangkok abgfloge uf Phnom Penh. Am Tag druffä am Abig hed d Interpid Tour agfange. Mier sind de nach zwei wiitere Nächt mim Bus am 8. uf Battambang gfahre, hend det es paar Sache gmacht (schriibi es anders mal drüber) und am 10. simmer etzt schliesslich uf Siem Reap gfahre mim Bus womer de morn gönd gu Angkor Wat aluege. Aber etzt zerst wasmer in Phnom Penh gmacht hend.

Nachm Flug uf Kambodscha hani nümme viel gmacht, defür am andere Tag de. Bi am morgä mitme Tuk Tuk d Hauptstadt vo Kambodscha gu erkunde. Zerst de Wat Phnom nach dem Hügel und nach de Frau Penh isch die Stadt benannt worde. Nah hani wellä gu de Royal Palace aluege…der hed aber dummerwiis übere Mittag nid offä gha. Also hed mii Fahrer gfunde er zeigi mier d Stadt und wasmer alles müess Fötälä. Ha zwar meistens nid gwüsst wases isch, aber wenns mer gfalle, hed hanis gliich gfötäläd. Am Namittag hani numal en alauf gnu und bi de Royal Palace gu aluege.

Am Abig hend sich all Teilnähmer und de Guide vode Interpid Tour im Hotel troffä. Grossi überraschig…ich ha mitre Gruppe vo 20-30 jährige grächned…denkste…ich bi de Jüngst und die Ältist isch 73i, all ander irgendwo dezwüsche. Aber en super Truppe bunt gemischt us Päärli, Kollege, Einzelreisende, die chömed us Italie, Australie, UK, USA und de Schwiiz.

Am andere morgä hemmer de en gmeinsami Tuk Tuk Tour gmacht, dank derä hani de au gwüsst wasi am Tag vorher gfötäläd ha. Am Namittag simmer uf Killingfields und ines ehemaligs Chriegsgfängis. De Namittag isch eim zimli under d Huut gange, mr hend en extra Füehrer gha wo üs d Gschicht zu dene Ort us erster Hand hed chönne verzellä.

Am nächste Tag simmer de uf Battambang ufbroche…