Was schusch so gloffä isch

Hurra ich bi mim Boot über d Gränzä 😀 Aber zerst alles de Reihe nache. Ich ha nu ganz viel Fotäli vode Tämpel in Angkor Wat woni nu möcht ufelade und es paar andere Ort.

Etzt mal eifach was alles so gloffä isch ide letschtä paar Täg:nach Siem Reap mit de Tämpel vo Angkor simmer ines chliises Dörfli gfahre und hend det binre Familie übernachted, ganz en spezielli Erfahrig gsi. Als nächsts simmer uf Kampot (2 Nächt) gu luege wo de Pfeffer wachst und a Kep Beach gu bädälä. Denn simmer uf Sihanoukville (2 Nächt), wo mer en Bootstour gmacht hend mit Schnorchlä, Bade und Grilliere. Denn wär d Tour eich wieder retour uf Phnom Penh und ich ha mich de abkoppled.

Ich bi uf Koh Rong, en wahre Traum. En Inslä mit chliine Bungalow druffe und hauptsächlich Dschungel. Strom heds nume vom Abig am 6i bism Morgä am 6i gäh, Internet heds au fast keis gha und ich ha eifach mal chli la bambälä und ha d Hängematte und miis Buech gnossä. Zwei ganzi Täg hani uf dem chliine Insäli verbracht.

Am letschtä Mäntig ischs de wieder zrugg id Zivilisation gange. Ich ha d Katamaran Fähri uf Sihanoukville gnu und bi mim Bus uf Phnom Penh. Det hani de eisch übernachted und am nächste Tag (also am Ziistig) bini de mim Schiff de Mekong durab uf Vietnam. Das wär äml de Plan gsi, dummerwiis isch s Boot defekt gsi, also hemmer mim Busli bis a Grenze müesse. Vo det heds de nah Klapped und mier sind mim Schiff uf Chau Doc in Vietnam gfahre. Es hed sich denn ergäh, dassi zwei ander troffä ha uf dem Schiff. Mit dene bini de gad vo Chau Doc wiiter uf Can Tho mim Bus. In Can Tho hemmer einisch übernachted, dasmmer am andere Morgä hend chönne gu d Floating Markets aluege.

Am gliiche Tag simmer de mitenand mim Bus uf Ho Chi Minh City (z früenrige Saigon). Det hani de für zwei Täg d Stadt erkundet und bi de am Samstig uf eigeti Fust wiitergreist i Nationalpark Cat Tien. Det hani drüü geniali Nächt inre Dschungel Lodge verbracht direkt am Fluss. Am Ziistig ischs de wiiter gange uf Da Lat es Städtli im Hochland. Agnähmi 25° hend mich det erwarted und ich ha zerst mal am abig miis Jäggli agleid zum i Usgang gah. Am Dunnstig gahds etzt wiiter mitme EasyRider. Ich döff amne Töfffahrer zwei Täg hinne druff sitze und er bringt mich de schlussendlich uf Nha Trang. Ah ja übrigens in Da Lat hani zerst mal en Roller gmietet und bi Rund um d Stadt ume diversi Sehenswürdigkeite gu aluege 🙂

Übrigens da nu en Karte mit de Route und de Ort woni überall scho gsi bi,