En Nacht imne Homestay

Mier hend ei Nacht binre Familie ufm Land döffä verbringe. Das isch en mega interessanti Erfahrig gsi. Ufm Wäg det anesimmer nu imne Floating Village, also ämne schwimmende Dorf verbii cho. Es wär wahrschinlich nu viel spannender mal gad nach de Rägäziit i dem Dorf zsii.

De simmer gu en Tempelalag (Sambor Prei Kuk) gu agugge wo nume us Ziegelstei buut worde isch und sogar nu älter als Angkor Wat isch. Nachm Tempel hemmer en Schuel bsuecht, wo en Herr bi sich dihei de Chind vode Umgebig änglisch biibringt. Det simmer de vo Ochsecharre abgholt worde und sind uf d Riisfelder füre Sunneuntergang gfahre. Schlussendlich simmer de bide Familie abglade worde und mer hend es genials Znacht übercho.